Ka dy muaj që është emëruar në krye të Vllaznisë megjithatë ende nuk ka nisur stërvitjen me ekipin. Disi e palogjikshme por në fakt ky është realiteti i basketbollit shqiptar teksa ende nuk ka një datë nga FSHB se kur do të nisë kampionati.
Trajneri Nikolai Gospodinov megjithatë i ka idetë e qarta se kur duhet filluar stërvitja, lojtarët që i duhen për skuadrën dhe po ashtu edhe për objektivat e saj. I ka rrëfyer të gjitha këto në një intervistë të dhënë për “Shkodra Sport” kur ka deklaruar:
– Mister, kur do të nisë stërvitjen ekipi i Vllaznisë?
– Të hënën e datës 2 shtator?
– Shtator?
– Po, po në shtator.
– Mos jeni vonë?
– Jo. E para kontratat e gjithë basketbollistëve tonë startojmë më 1 shtator dhe e dyta, kampionati pritet të fillojë në tetor.
– Vetëm dy amerikanë kanë firmosur deri tani. Do të ketë edhe lojtarë të tjerë që do të vijnë tek Vllaznia?
– Ne jemi në bisedime edhe me lojtarë të tjerë, por nuk mund t’i bëjmë të ditur emrat e tyre pa i konkretizuar gjërat.
– Vllaznia është më e fortë me këta dy amerikanët që kanë firmosur tashmë?
– Nuk e di si do të veprojnë ekipet e tjera, por besoj se ne jemi më të fortë tashmë.
– Ka nevojë Vllaznia për lojtarë të tjerë?
– Besoj se të paktën na duhen edhe dy lojtarë të tjerë.
– Flitet për një pjesmarrje të mundshme të Vllaznisë në Ligën Ballkanike. Do të jetë kjo diçka e mirë për skuadrën?
– Unë mendoj se është një gjë e mirë sepse do të na ndihmojë të ruajmë formën e lojës dhe të rritemi më shumë nga ana profesionale.
– Mister, faleminderit për gatishmërinë…
– Faleminderit nga ana Juaj!
