Mund të thoni “jo, nuk ka mundësi”, por ky lajm që po lexoni tani nuk është fantazi e gazetarëve tanë. Në Spanjë raportohet se Jose Mourinho ka hequr dorë përfundimisht nga Antoine Griezmann dhe se Barcelona ka më shumë shanse se kurrë për të bërë të mundur blerjen e sulmuesit të Atletico Madrid-it. Verën e shkuar, Manchester United e kërkoi me ngulm francezin, i cili vlerësohej më shumë se 100 milionë euro.
Klauzola e tij e largimit pas fundit të këtij sezoni do të jetë “vetëm” 100 milionë, por “The Special One” e ka humbur durimin.
Portugezi mendon se shifra prapë se prapë është shumë e lartë dhe nuk do t’i prishë punë Barcelonës për 26-vjeçarin. Ky është një lajm fantastik për katalanasit, të cilët mendojnë se Griezmann është lojtari ideal për të zëvendësuar “kokë më kokë” yllin Neymar, i cili i braktisi duke kaluar te PSG-ja.
Griezmann është një sulmues i kalibrit botëror. Ai nuk ka driblimin e brazilianit dhe në përgjithësi as aftësitë teknike të këtij të fundit, por para porte nuk të fal. Me pak fjalë, po të na dëgjoni pak edhe neve, prisni një postim ironik “Gracias, Mou!” në verë! EDS
