Xhek Grilish e cilëson një skuadër të fortë Interin, finalisten që Mançester Siti do të ketë përballë në Champions këtë sezon, por është optimist se “qytetarët” do të arrijnë që t’i thyejnë më 10 qershor në Stamboll. Ai bëri një ndeshje fantastike në “Etihad”, ndërsa zor se Karvahal fitoi ndonjë duel kundër tij gjatë 90 minutave të mërkurën.
Çmimin e lojtarit të ndeshjes e fitoi Bernardo Silva, autori i dy golave në triumfin 4-0, por nuk do të kishte qenë mëkat sikur ai t’i ishte akorduar edhe Grilishit. “Unë po luaj mirë për momentin, kam vetëbesim, por mendoj ende që duhet të shënojë më shumë gola dhe jap asiste”, tha sulmuesi anglez.
“Interi në finale? Në çdo ndeshje që luajmë ne përpiqemi që të dominojmë topin. Trajneri që kemi është një gjeni dhe jam i sigurt se ai do të na tregojë se ku mund t’i lëndojmë. Do të jetë një ndeshje e vështirë.
Ata kanë shumë eksperiencë. Duhet të jesh një skuadër e mirë për të mbërritur në një finale dhe ata janë të tillë kështu që meritojnë t’u japësh respekt. Është e pabesueshme.
Unë isha shumë i lumtur që javën e shkuar që po luaja në këtë ndeshje. Thjesht të jesh pjesë e saj është një ndjesi kaq e bukur. Një javë më vonë ndodhem këtu dhe kemi fituar 4-0. Jo shumë skuadra mund t’ia bëjnë diçka të tillë Realit të Madridit.
Por kur ne jemi të gjithë të bashkuar dhe luajmë në shtëpi veçanërisht, ne thjesht ndihemi të pandalshëm”, tha sulmuesi më i shtrenjtë i Mançester Sitit, për të cilin “qytetarët” i paguan 100 milionë paund Aston Vilës.
