Ka nisur prej disa ditësh në qytetit e Durrësit grumbullimi dhe seleksionimi i ekipit kombëtar të peshëngritjes, që më datat 5-14 prill do të marrë pjesë në Kampionatin Europian të Shtangës, që këtë vit zhvillohet në Tiranë. Për t’i paraprirë këtij eventi madhështor që zhvillohet në Shqipëri ka nisur menjëherë puna me seleksionimin e peshëngritësve më të mirë, kandidatë për në ekipin kombëtar.
Plot 21 meshkuj e 4 femra ndodhen të grumbulluar dhe do të vazhdojnë të jenë në statusin e kandidatit deri në zhvillimin e Kampionatit Kombëtar të Peshëngritjes, që do të përcaktojë edhe listën përfundimtare.Aktualisht nga ekipi i Vllaznisë janë të grumbulluar sportistët Isa Bala, Valmir Kotrri, Gridi Jahja dhe Xhulio Prroni. Bashkë me kombëtaren tonë është duke u stërvitur edhe i mirënjohuri Erkand Qerimaj që megjithatë për shkak të pezullimit të tij nuk do të marrë pjesë në këtë Kampionat Europian.
Kombetari. Më datën 2 mars ndërkohë, në qytetin e Elbasanit, do të zhvillohet kombëtari i shtangës, veprimtari që do të ndajë “shapin nga sheqeri”. Pra, pas këtij turneu do të përcaktohet edhe lista përfundimtare e ekipit kombëtar, që do të shkojë në Europian.Deri atëherë, të gjithë kandidatët do të vijojnë stërvitjen të grumbulluar, sipas një plani që ata dhe trajnerët e tyre kanë paraqitur në Federatën Shqiptare të Peshëngritjes. Kjo listë e gjerë është bërë me qëllim që Federata të ndjekë nga afër të gjithë shtangistët cilësorë dhe më pas të vendosë për më të mirët, ndonëse fjalën përfundimtare do ta thotë kampionati dhe garat. Shtangistja e vetme që mungon është Romela Begaj, e cila mësohet se është duke u stërvitur në Greqi.
Europiani Më datat 5-14 prill, në pallatin e sportit “Asllan Rusi” në kryeqytet do të zhvillohet edicioni i radhës i Kampionatit Europian të Peshëngritjes. Vendi ynë kishte fituar të drejtën e organizimit të Europianit të vitit 2014, por tërheqja e Polonisë solli afrimin e këtij turneu në Tiranë. Të pranishëm në fundin e vitit të kaluar në kryeqytetin shqiptar ishin disa përfaqësues të Federatës Europiane, që konfirmuan mbështetjen e tyre.
Për këtë arsye edhe Federata jonë ka nisur prej kohësh punën, për të bërë një paraqitje sa më të mirë në Europianin e shtëpisë, ku synon medalje. Për kuqezinjtë do të mungojë shkodrani Erkand Qerimaj, i skualifikuar për përdorim dopingu, por mësohet se ai vazhdon të stërvitet normalisht.
www.shkodrasport.com
