Pep Guardiola ka pranuar se ai mund të ketë gabuar në largimin e portierit Joe Hart, në fillim të mandatit të tij si trajner i Manchester City. Ish-numri 1 i Anglisë u deklarua si i tepërt për kërkesat e trajnerit katalanas në vitin 2016, kur Pep arriti në stadiumin “Etihad”, me Claudio Bravon, që u mor nga Barcelona për ta zëvendësuar atë.
Ndërsa Bravo ka provuar fatin e përzier te Manchester City dhe përfundimisht e ka humbur vendin e titullarit para brazilianit Ederson, Hart përjetoi një periudhë të vështirë huazimi me Torinon në Seria A, përpara se të shkonte te West Ham dhe më vonë te Burnley.
Tani, ndërsa Hart po përgatitet për një “ribashkim emocional” me tifozët në “Etihad”, por duke përfaqësuar ngjyrat e klubit të tij të ri, Pep e pranon se largimi i tij nga “qytetarët” nuk ishte një vendim i lehtë.
“E di se sa i dashur ishte për tifozët, për njerëzit këtu. Ai ishte një portier i jashtëzakonshëm dhe pati rezultate të pabesueshme në këtë klub, – u tha Pep gazetarëve. – Kjo është arsyeja pse nuk ishte e lehtë për mua, për të marrë një vendim.
Gjithmonë jam menduar shumë në marrjen e vendimeve, që duhet të jenë të drejta. Në karrierën time kam marrë vendime të mira dhe vendime shumë të këqija, por koha e do të vendosësh në momentin e duhur dhe në kohën e duhur. Ndonjëherë kam marrë vendime, për të cilat më pas jam penduar. Kjo ndodh në futboll.
Unë mendoj se nuk ka dyshime se sa i rëndësishëm ishte dhe është portieri Hart. Nesër do të shihni se si njerëzit e vlerësojnë atë, për çfarë ka bërë në këtë klub. Normalisht, lojtari mendon për veten, nuk është e lehtë, por Hart e vuri pak veten në pozicionin tim dhe tha se më kuptonte në atë vendim që mora. Prandaj, e vlerësoj shumë sjelljen e tij”.
