Manchester City, pas triumfit në finalen e FA Cup, përgatitet për një tjetër finale, atë të Champions League, që do të luajë këtë fundjavë në Stamboll. Përballë kampionëve të Premier League do të jetë Inter, në një ndeshje ku anglezët konsiderohen favoritë.
Gjithsesi, Ilkay Gundogan, heroi i finales së dy ditëve më parë, me dy golat që i dhanë fitoren City, ul euforinë: “Nëse Inter ka ardhur deri këtu nuk është rastësi. Përballë do të kemi një ekip me shumë kualitete pavarësisht se nuk fituan dot titullin në Itali, por fituan Kupën e Italisë”.
“Inter është një ekip që e di se si fitohen trofetë dhe luajnë në një mënyrë mjaft agresive, ndaj s’ka për të qenë e lehtë. Gjithsesi, këto janë ndeshjet për të cilat luan një lojtar. Pasi fituan FA Cup tani mendojmë për tripletën dhe faktin se jemi afër saj dhe mund t’ia dalim mbanë”, tha Gundogan.
“Kemi luajtur mjaft mirë këtë sezon dhe i meritojmë këto trofe. E ardhmja ime? Ende asgjë nuk është vendosur, ndaj të shohim se çfarë do të ndodhë. Unë s’kam nevojë për këto ndeshje për t’u ndjerë i vlerësuar”, tha mesfushori gjerman, kontrata e të cilit me Manchester City skadon më 30 qershor./telesport/
