Astrit Hafizi është i bindur se Vllaznia e këtij sezoni ka tejkaluar çdo pritshmëri dhe për këtë arsye e cilëson një mrekulli punën që ka bërë Thomas Brdariç duke e çuar afër titullit kampion.
Megjithatë, në “SuperSport” ai e vlerësoi ndeshjen e sotme të shkodranëve si më të dobëtën e këtij sezoni, jo për faj të trajnerit por të lojtarëve që kishte në dispozicion e të cilët kishin mangësi të dukshme cilësorë në krahasim me skuadrat e tjera pretendente.
“Vllaznia nuk hyri fare në lojë, ishte në veprime të dëshpëruara, nuk luajti mirë si skuadër. Ishte ndeshja më e dobët e Vllaznisë, në momentin më të gabuar. Kur kishte nevojë që skuadra të nxirrte në pah grupin, anën më të mirë të saj, doli jashtë loje, duke bërë veprime të tepruara individuale, mbajtje topi, pa qartësi.
Në fund u bë nervoze, nuk e kuptoj pse, se Kukësi luajti një ndër ndeshjet më të qeta, me qetësi, është skuadër shumë e vështirë dhe sot Vllaznia e humbi një mundësi dhe mund ta nxjerrin jashtë loje fitoret e skuadrave të tjera nesër.
Nëse flasim për Vllazninë si pretendente, i mungojnë disa faktorë. E para është cilësia, cilësia lë për të dëshiruar. Çdo skuadër që kryeson mendoj i ka 2-3-4 lojtarë cilësorë. Te Vllaznia mungon, po të shohësh edhe me vëmendje ata që u futën, ata që ka blerë në janar, lënë për të dëshiruar. Pastaj ekipi pëson gol që në minutën e 5. Me një skuadër që ka sulm të tillë që në minuat e para nuk mund të luash kaq hapur.
I mungon cilësia, duke futur edhe sulmuesit. Kanë punuar për grupin, por nuk ka sulmues goli. Për mua nuk ka, sikur të dilte në vendin e katërt e të pestë për këtë vit, ka realizuar një objektiv. E kemi thënë se Vllaznia nuk u ndërtua për të dalë kampione. Teuta, Partizani e Laçi kanë bërë disa blerje kaq të mira.
Me grupin që ka Brdariç po bën maksimumin, me atë që ka paraqitur në këtë sezon mendoj se ka bërë mrekulli. Dhe ta shohësh sot është lojë jo e mirë e Vllaznisë, të kënaqemi me këtë lojë mendoj se është shumë pak.
Ka marr maksimumin e po merr, puna e tij është për t’u lavdëruar. Sot mund të gjenim gabime e ta kritikonim, por duke parë këta lojtarë që ka…”, ishte analiza e Hafizit. /vipsport/
