rjan Xhemalaj ishte një nga lojtarët më të mirë të skuadrës së Erzenit në suksesin ndaj Vllaznisë, në sfidën që u zhvillua në fushën neutral të qytetit të Peqinit. Xhemalaj është një lojtar me kualitete dhe shënoi golin e parë ndaj shkodranëve, por shërbeu edhe me asiste gjatë sfidës. Në një intervistë dhënë enkas për “Vipsport.al”, ballshioti Orjan Xhemalaj ka folur për golin, dedikimin dhe ndeshjet e radhës.
-Xhemalaj, besuat se do të shënonit dhe fitonit ndaj Vllaznisë?
Të them të drejtën, më shumë kam besuar te fitorja, duke parë punën kolosale është bërë këtë periudhë në skuadër, afrimet e reja që i kanë dhënë tjetër ritëm ekipit, por edhe optimizmi. Pastaj, një ndeshje si kjo me Vllazninë na ka vënë para përgjegjësisë, duhej që ta fitonim edhe për tifozët tanë…
-Shkodranët janë shprehur të bindur për fitore ndaj Erzenit me deklaratat e dhëna gjatë javës së shkuar…
Unë kam eksperiencë, në Kategorinë e Parë, por edhe në Superiore kam qenë pjesë e skuadrave të Teutës dhe Dinamos. Të them të drejtën, le të ngjitet kush e meriton, kë ekip që do të nxjerrë fusha dhe rezultatet në Superiore. Erzeni luajti me shpirt dhe tregoi se meritoi fitoren bindëse ndaj Vllaznisë.
-Keni dedikim për golin dhe fitoren?!
Padyshim që po, për tifozët tanë që janë të mrekullueshëm, janë një motiv shumë i madh për ne dhe nuk na lënë vetëm në asnjë fushë. Madje, në qoftë se ka një arsye shumë të fortë se pse unë qëndroj te Erzeni, ndonëse nuk më kanë munguar ofertat nga Superiorja dhe Kategoria e Parë, janë ata, lojtari ynë i 12-të.
-Si e shihni garën, me Dinamon që mundet e Vllazninë që tashmë ka vetëm 4 pikë më shumë?
Gara është e fortë, madje me këtë formulë unë shoh në lojë edhe Besëlidhjen e Korabin, janë skuadra të forta dhe që kanë qenë pjesë e elitës. Por, ne do të luajmë fortë në çdo ndeshje dhe duhet që të bëjmë maksimumin. Të mos shohim kundërshtarët, por vetëm të marrim pikët maksimale. Kështu, në fund Erzeni do të jetë në Superiore./vipsport/
