Tri pikët e marra ndaj Partizanit e kanë motivuar edhe më shumë Teutën, që tani kërkon fitoren e dytë radhazi në shtëpi ndaj Kukësit. Suksesi në “Selman Stërmasi” i ngjiti në klasifikim, por ende nuk është arritur asgjë. Mbijetesa është një mision i vështirë, por jo i pamundur thotë mesfushori Ardit Hila, i cili në intervistën për “Panorama Sport” zbulon edhe disa momente nga dhoma e zhveshjes pas përfundimit të takimit me “demat e kuq”.
“Ishte një fitore shumë e rëndësishme dhe ne ishim përgatitur për të marrë maksimumin. E dinim se do të vuanim, por këto fitore të shijojnë më shumë. Pas takimit e kthyem në festë, por gëzimi arriti kulmin kur mësuam se Flamurtari barazoi ndaj Vllaznisë. Ishim dyfish të lumtur”, tha elbasanasi.
Në fillim ishit skeptikë, por në fushë ndodhi e kundërta. E kishit menduar aq të lehtë fitoren?
Nuk mund të them se ishte një fitore e lehtë, pasi luftuam shumë. Madje, ishim edhe në disavantazh, por treguam forcën tonë duke e barazuar ndeshjen dhe më pas e fituam. Fakti që Partizani luajti pa tifozë e bëri edhe më të lehtë për ne.
Tani vjen Kukësi, një kundërshtar akoma edhe më i fortë. I druheni?
Në shtëpinë tonë nuk i druhemi askujt. Në këtë fazë kemi gabuar vetëm ndaj Kamzës dhe ajo ishte ndeshja jonë më e dobët. Gjithsesi, ajo është hedhur pas krahëve dhe do të kërkojmë të marrim fitoren. Jemi të detyruar për të fituar.
Në këtë sezon keni tri humbje me Kukësin. Do të ndikojë ky fakt?
Absolutisht jo. Është e vërtetë që nuk kemi asnjë rezultat pozitiv me Kukësin në këtë sezon, por ky fakt na motivon edhe më shumë për t’i mposhtur. Ata po kalojnë një moment të mirë, por ne kemi një objektiv për të arritur dhe të japim 100% tonë për t’i mposhtur.
Kukësi është një nga skuadrat që ju ka shënuar më shumë, kush është lojtari që mendoni se duhet të keni më tepër kujdes?
Kukësi ka një ekip mjaft të mirë dhe statistikat tregojnë se mund të shënojnë të gjithë. Gjithsesi, Guri është një nga lojtarët më të rrezikshëm jo vetëm të Kukësit, por edhe të Superiores. Mendoj se ne duhet të luajmë si ndaj Partizanit, në mënyrë që të dalim me fitore. Duhet të shfrytëzojmë në maksimum rastet që do të kemi.
Një fitore me Kukësin do të ketë vlera të dyfishta, pasi Vllaznia dhe Kamza luajnë së bashku. Çfarë prisni nga kjo ndeshje?
Fillimisht, ne jemi të përqendruar te ndeshja jonë. Nëse i fitojmë të gjitha ndeshjet e mbetura, nuk ka rëndësi se çfarë ndodhë me rivalët tanë. Gjithsesi, nuk mund ta mohoj se bëjmë tifo për Vllazninë dhe shpresoj që të fitojnë shkodranët./panorama-sport/
