Mbrojtësi shkodran Elseid Hysaj pas pushimeve të bëra në Shkodër, është rikthyer në Itali dhe ka nisur stërvitjen me ekipin e Napolit duke u vënë nën urdhërat e trajnerit të ri të tij Karlo Ançeloti. Ky i fundit, për momentin e ka në planet e tij por drejtuesit e klubit napolitan janë duke punuar për gjetjen e zëvendësuesit të tij.
Por ndërkohë futbollistin e kombëtares shqiptare janë duke e pritur edhe në Angli. Pikërisht tek ekipi i Çelsit ku trajner do të jetë Mauricio Sarri. Ky i fundit pasi e ka patur në dispozicion fillimisht tek Empoli e më pas tek Napoli, dëshiron ta marrë me vete edhe në Angli.
Problemi i vetëm mbetet arritja e marrëveshjes në mes dy klubeve. Tek italianët ai ka një klauzolë prej 50 milionë eurosh për prishjen e kontratës dhe me shumë mundësi, klubi i Abramoviç do ta paguajë atë për t’ia plotësuar dëshirën trajnerit që kanë marrë për pankinën e tyre.
Një lëvizje e tillë pritet të realizohet në ditët e ardhshme dhe një transfertë e tillë duket punë e kryer. Për 24 vjeçarin shkodran në këtë mënyrë karriera e tij duket se po kap majat. Ai ka njohur një rritje të pamendueshme duke kaluar fillimisht nga Empoli tek Napoli ku zhvilloi dy sezone shumë të mira dhe gjatë kësaj periudhe, ai është vënë në shënjestër të shumë ekipeve të njohura të Europës.
Megjithatë, Hysaj është shumë i lidhur me trajnerin Sarri që kërkon ta ketë me vete edhe tek Çelsi. Kjo do të ishte një përvojë shumë e madhe për të dhe normalisht një mundësi e mirë për të treguar vlerat edhe në një nga kampionatet më të forta të Europës aktualisht siç është kampionati anglez.
www.shkodrasport.com
