Vllaznia duket në rrugën e mbarë për rikthimin në Superligë dhe madje, ish- futbollisti dhe ish- trajneri i saj Hysen Dedja, mendon se ky objektiv nuk duhet diskutuar. Në një prononcim për “Shkodra Sport”, ai ndërkohë u ka bërë thirrje drejtuesve të klubit të nisin të mendojnë që tani për skuadrën e sezonit të ardhshëm e cila duhet të jetë dinjitoze në Superligë.
“As që e vë në dyshim se Vllaznia do të jetë në Superligë në fund të sezonit. Por problemi qëndron tjetër kund. Unë e kam biseduar edhe me trajnerin e saj, mikun tim Hasan Lika, se duhet filluar që tani të mendohet për sezonin e ardhshëm në Superligë.
Drejtuesit e klubit duhet të lëvizin sa më shpejt në mënyrë që të ndërtohet ekipi i cili do të përfaqësohet denjësisht në atë kampionat dhe jo si këto shtatë- tetë vitet e fundit. Pse jo, për të synuar edhe Kupat e Europës. Nëse gjërat nuk bëhen kështu, atëherë nuk është zgjidhur asgjë në këtë drejtim”- është shprehur ai.
I pyetur nëse Vllaznia duhet t’i besojë shkodranëve apo të ketë një gërshetim me futbollistë të huaj, Dedja përgjigjet: “Në këto momente kur futbolli shqiptar po kalon një krizë financiare dhe në këtë aspekt, nuk ja vlen ndoshta harxhimi i parave për të blerë të huaj.
Ndryshe do të ishte situata nëse në krye të klubit ka një president apo donator, që ka dëshirë të ndërtojë një ekip të fortë. Por gjithsesi, unë jam për një Vllazni me shkodranë”.
© shkodrasport.com
