Vendimi i Komisionit të Disiplinës një javë më parë, duke marrë një masë ekstreme ndaj ekipit të Tërbunit me dënimin e zbritjes nga Kategoria e Parë, nuk është pritur aspak mirë në kampin pukjan. Kapiteni i kësaj skuadre, Migel Metani ka reaguar për herë të parë në lidhje me një vendim të tillë në një intervistë për “Shkodra Sport”, duke thënë se në dëm të Tërbunit ka pasur sulme të shumta nga ana e FSHF dhe arbitrave vitet e fundit.
Metani u shpreh se në Pukë javën e kaluar nuk ndodhi asgjë përveçse një proteste ndaj arbitrit anësor Xhulio Mani, ndërsa theksoi se në karrierën e tij si futbollist nuk e kishte parë kurrë një arbitrim të tillë. Kujtojmë këtu se, ndeshja e javës së kaluar në Pukë mes Tërbunit dhe Turbinës u gjykua nga gjyqtari shkodran, Albano Stolaj. Megjithatë, më poshtë mund të lexoni edhe intervistën e kapitenit të ekipit pukjan, Migel Metani, dhënë për “Shkodra Sport” gazetarit Maringlen Zhivani.
“Çfarë ndodhi javën e kaluar në Pukë?
Në Pukë javën e kaluar nuk ndodhi asgjë dhe vetëm asgjë, përveçse një proteste ndaj arbitrit anësor Xhulio Mani, i cili kishte ardhur me një motiv për të arbitruar keq ndaj nesh, ku edhe arbitri kryesor Albano Stolaj gjithashtu kishte rolin e tij, me ndërhyrje horror ndaj futbollistëve tanë dhe me asnjë faull dhe asnjë karton për ekipin e Turbinës. Në jetën time si futbollist, nuk kisha parë ndonjëherë kështu arbitrimi.
A kishte goditje ndaj gjyqtarit anësor Xhulio Mani?
Shiko, e thashë edhe pak më lart, nuk kishte asnjë goditje, po të them që asnjë. Janë të gjitha gënjeshtra, ku ne kemi edhe fakte me video. Asnjë prekje, thjeshtë protestë si në gjithë kampionatet e Europës. Në fakt, ne si futbollistë kemi pasur goditje horror nga lojtarët e Turbinës, ku siç i keni parë pamjet me portierin tonë Vata, i cili për pak u desh që të humbte jetën dhe arbitri Stolaj nuk e ndali lojën.
Po ta shohësh videon e ndërhyrjes ndaj Vatës, arbitri Stolaj sheh topin duke vazhduar lojën dhe në momentin që topin e marrim ne, ai e ndal lojën. Jam i bindur se në qoftë se topin do ta merrte futbollisti i Turbinës, ai nuk do ta ndalte, pasi kishte ardhur vetëm me një qëllim për të na dëmtuar neve, pra ekipin e Tërbunit.
Bashkëpunim dhe dashakeqësi ndaj ekipit të Tërbunit?
Po, e them me plot bindje një gjë të tillë, sepse nuk është vetëm kjo ndeshje e arbitruar keq ndaj nesh. Kemi dy vite që nga këta palaço arbitra dënohemi dhe na dëmtojnë. Në këtë hark kohor prej dy vitesh, me ekipin e Tërbunit kemi 17-penallti të dhëna kundër nesh dhe në favor tonin dy, ku edhe në një ndeshje na janë dhënë dy penallti kundër në Berat.
Eshtë për të ardhur keq se si ekipi i Tërbunit penalizohet kështu, sepse është një nga ekipet më korrekte me paga dhe më të organizuara në Kategorinë e Parë, gjithashtu edhe në Superiore, ku presidenti jonë Gjon Gjonaj ka qenë mjaft korrekt këto gjashtë vite që kam qenë unë në ekip. Nuk kemi asnjë rrogë të prapambetur, i kemi marrë të gjitha.
E ardhmja e kapitenit Metani, por edhe e Tërbunit?
Të ardhmen time e shoh tek Tërbuni. Ndjehem mirë këtu. Më pas, të ardhmen e Tërbunit do ta shohim, pasi shefi i klubit, Viktor Gjoni, është prononcuar që do ta hedhim në apel çështjen tonë dhe pastaj në CAS, ku jemi të sigurtë që do ta fitojmë”,-mbylli prononcimin e tij, kapiteni i Tërbunit, Migel Metani.
Maringlen ZHIVANI
