Ishte një nga sportistet që me performancën e saj la gjurmë në vitin e shkuar. Duke merituar kështu edhe titullin si një prej talenteve të vitit, akorduar nga “Shkodra Sport”. Medina Hukaj tregon në një intervistë për gazetën se ndihet shumë krenare për këtë arritje. Dhe se do punojë akoma më shumë që në të ardhmen të përmirësojë performancën e saj, por edhe atë të skuadrës.
-Një prej talenteve të vitit, si ndihesh me këtë vlerësim?
Ndihem e priviligjuar që arritjet e mia dhe puna e shumë viteve ka dhënë frytet e saj.
-Sa i vështirë ishte viti që lamë pas për ju dhe skuadrën tuaj?
Sigurisht që kemi hasur vështirësi, mund të them ndoshta edhe më shumë se në vitet e shkuara. Kjo sepse një pjesë e titullareve, më saktë 4 prej tyre janë larguar nga ekipi. Kjo na e ka bërë më të vështirë organizimin e ekipit dhe arritjen e objektivave tanë.
-Një objektiv personal i Medinës?
Objektivi im personal është të përmirësohem. Duke qenë në moshë të re sigurisht kam shumë për të mësuar. Duke ndjekur udhëzimet e trajnerit e po ashtu duke marrë edhe eksperiencën e shoqeve të skuadrës, që kanë vite që merren me sport.
-Do ketë një përmirësim të performancës në vitin 2024, ku pse jo të mos jesh sportistja e vitit?
Do punoj fort që ta arrij. Shpresoj që po, pasi me punë arrihen sukseset.
-Një ëndërr që ndoshta e keni përsa i përket basketbollit?
Të ruajmë titullin kampion për shumë kohë. Dhe mbase ky titull ti përçohet edhe brezave të ardhshëm të Vllaznisë.
