Mbremjen e se henes koleksionoi ne Leverkusen te Gjermanise te 11-ten fitore ne boksin profesionist. Njekohesisht mori edhe gjerdanin e nje titullit te rendesishem te Federates se njohur boterore WBC, ate te “CISBB Heavy”. Boksieri shkodran Nelson Hysa vijon me rrugen e tij te suksesit, por emocionet qe ka perjetuar dy nete me pare do te mbeten gjate ne kujtesen e tij.
Ne nje interviste per gazeten “Shkodra Sport”, kampioni yne flet per atmosferen kuqezi ne Leverkusen, ndeshjen e tij ne ring, por edhe synimet e tij per te ardhmen. Per me shume, lexoni prononcimin e tij:
– Nelson, një tjetër fitore në boksin profesionist. Çfarë kishte të veçantë suksesi i së shtunës në ringun e Leverkusenit?
Më shumë sesa suksesi në ring, dua të ndalem tek emocionet që përjetova jashtë tij, emocione që nuk i kisha provuar kurrë më parë në karrierën time. Që nga hoteli ishin shqiptarët që kishin rrethuar pjesën e poshtme të tij dhe prisnin të më shoqëronin për në pallatin e sportit ku do të zhvillohej ndeshja, te mbushur me flamuj, me daulle e plot entuziazëm.
Edhe në pallat të sportit atmosfera ishte e jashtëzakonshme me flamujt kuqezi që kishin pushtuar sallën. Momenti më emocionues ka qenë këndimi i himnit kombëtar teksa e gjithë salla këndonte njëherësh (ndoshta ajo ishte adrenalina e cila më bëri të shpërthej e të jem aq në formë.
– Duket që pas këtij suksesi, ka vend edhe për falenderime nga ana juaj apo jo?
Sigurisht që po dhe përmes gazetës tuaj dua të falenderoj shumë vetë, duke filluar nga promotori im Briget Seitaj, për të vazhduar me Mondin dhe Melin, dy shkodranët të cilët bënë të gjithë atë atmosferë brenda e jashtë sallës dhe gjithashtu mbështetje financiare. Unë dua t’i falenderoj pa masë këta djem shkodranë që mu gjenden aq pranë në këtë mbrëmje të paharruar për mua.
– Të kthehemi tek ndeshja, t’u deshën diçka më shumë se 2 minuta për ta mposhtuar kundërshtarin argjentinas…
Kundërshtari ishte i një niveli të kënaqshëm, me 13 fitore e që vinte me ndeshjen e fundit me fitore. Në fakt kundërshtari ra në lojën tonë, pikërisht në atë që ne kishim planifikuar e atë e bëri që në fillim. Po të ishte për mua, do kisha pas dëshirë të mbaronte edhe për 10 sekonda. Janë emocione e mundësi që njeriu do patjetër me i marr kur i sheh aq afër dhe mundohet të bëjë më të mirën.
– Fitorja e 11-të erdhi tashmë. Cilët janë synimet tuaja për më tej?
Shkojmë për të 13-tën brenda këtij viti. Pra mendoj se do të kem edhe 2 ndeshje të tjera deri në dhjetor dhe padyshim që objektivi është për t’i fituar edhe ato. Duke ndodhur kështu, kuptohet që edhe renditja ime në ranglistën botërore do të përmirësohet edhe më tej.
– Meqë përmendët renditjen, keni një synim tashmë edhe për të kur aktualisht ndodheni në vendin e 66-të në Botë?
Gjergj, në një intervistë që të pata dhënë në fillim të këtij viti, të pata premtuar se brenda vitit 2023, do të renditesha në 100-shen më të mirë të Botës. Premtim që siç e thatë edhe vetë tashmë e kam realizuar. Kuptohet që shoh vetëm përpara.
– Por promotori juaj Briget ka thënë se synimi është 50-shja më e mirë, apo jo?
(Qesh) Afër jemi. Përderisa e ka thënë njeriu që më mbështet, edhe mund të realizohet. Nuk jemi larg, por duhet t’i marrim gjërat një e nga një.
– Së fundi, në Leverkusen fituat një tjetër titull të rëndësishëm të WBC. Çfarë do të thotë kjo për ty?
Të jesh pjesë e WBC dhe fitues i një prej titujve të saj, është ëndërr për çdo boksier dhe prandaj pas këtij suksesi, nuk ka sesi të mos jem i lumtur.
Intervistoi: Gjergj KOLA
