Krerët e Federatave të futbollit në Shqipëri dhe Kosovë janë takuar sot në Tiranë për të diskutuar lidhur me implementimin e sistemit VAR nga sezoni I ardhshëm. Teska Armand Duka e ka bërë të qartë se sezoni I ri do ta gjejë Shqipërinë me sistemin e Asistentëve të Arbitrave, një gjë të tillë pritet ta bëjë edhe Kosova.
Futbolli kosovar dhe terrenet jo komode kanë bërë që kreu I FFK-së, Agim Ademi të kërkojë ndihmë nga FSHF për të bërë realitet VAR në Kosovë. Investimi prej 1 milion eurosh pritet të sigurohet edhe nga FIFA dhe organizmat e Kosovës, teksa drejtuesit e Federatës së Kosovës janë shpresëplotë. VAR, ndihmon gjyqtarët në riparjen e rasteve të dyshimta në fushë.
Njoftimi i FFK-së:
Presidenti Agim Ademi dhe sekretari i përgjithshëm, Eroll Salihu kanë qëndruar sot për vizitë pune në Tiranë, ku janë takuar me presidentin e FSHF-së dhe njëherësh anëtarin e Komitetit Ekzekutiv të UEFA-s, Armand Duka. Temë e këtij takimi ishte aplikimi i VAR-it në Kosovë, duke pasur parasysh se Shqipëria qysh vitin e kaluar ka filluar negociatat dhe përgatitjet për aplikimin e këtij sistemi.
FFK është duke punuar në drejtim të përshpejtimit të këtij procesi, në mënyrë që edhe në Kosovë VAR-i të fillojë të aplikohet në një afat sa më të shpejtë që është e mundur, teksa përvoja e FSHF-së në këtë drejtim mund të ndihmojë shumë.
Në fakt, FFK do ta përdorë të njëjtin sistem si FSHF-ja, që është njëri prej sistemeve më të avancuara, e ku do të shfrytëzohet edhe përvoja dhe softuerët e tyre. Kjo gjë do të mundësojë trajnimin intensiv të gjyqtarëve me sistemin VAR dhe do ta bëjë të mundur përshpejtimin e aplikimit të tij në kampionatin tonë.
Duke pasur parasysh mungesën e infrastrukturës së nevojshme në stadiume, sistemi VAR në Kosovë do të jetë mobil, për çka FFK e ka edhe mbështetjen e UEFA-s. Gjithsesi, një sistem i tillë është jashtëzakonisht i kushtueshëm dhe sipas vlerësimeve të FSHF-së ky sistem kap vlerën e mbi 1 milionë eurove.
FFK është këmbëngulëse që ta realizojë këtë projekt, për çka do të kërkojë edhe fonde nga FIFA por edhe nga institucionet përkatëse të shtetit, duke pasur parasysh se një sistem i tillë tashmë është bërë i domosdoshëm për futbollin./newsport/
