Pak ditë më parë, Mançester Junajtdi vendosi të shkarkonte portugezin Zhoze Murinjo dhe stolin ia besoi teknikut Solskjaer që debutoi me një fitore 1-5 në transfertë ndaj Kardifit. Në fakt, u duk se të gjithë futbollistët u çliruan me largimin e portugezit por mesa duket, të gjithë në klub e duan ose të paktën, këtë përshtypje japin në media.
Vetëm pak ditë pasi Murinjo u largua, ishte Pogba ai që falënderoi Murinjon për gjithçka që e kishte mësuar për aq kohë sa ishte trajner i Mançesterit megjithëse për një kohë të gjatë nuk kishin marrëdhënie të mirë. Mesa duket, Pogba nuk është i vetmi duke qenë se së fundmi ka folur edhe Huan Mata i cili gjithashtu ka falënderuar teknikun portugez.
“Kemi edhe dy ndeshje në ‘Old Trafford’ dhe duam t’i japim fund vitit në mënyrën më të mirë të mundshme, me dy fitore. Ishte një javë tjetër, duke pasur parasysh ndryshimin e trajnerit dhe do të doja të falënderoja Zhoze Murinjon për trofetë e fituar së bashku dhe i uroj atij më të mirën.
Me Solskjaer ka pasur fillimin më të mirë të mundshëm dhe fitorja kundër Kardifit na ka dhënë moral dhe duhet të jemi optimist. Duhet të shikojmë përpara dhe të punojmë shumë për t’u ngjitur në klasifikim dhe për të mos zhgënjyer tifozët”, u shpreh Mata. /vipsport/
