“Kam ardhur tek Vllaznia për t’iu bashkuar projektit të ri të saj”- kështu është shprehur në konferencën e sotme për shtyp mbrojtësi maqedonas Aleksandar Isaevski.
Në fjalën e tij, mbrojtësi i majtë ka shprehur bindjen se skuadra shkodrane do të luajë me objektivin e qartë për ta fituar edhe këtë ndeshje. Ja si i është përgjigjur ai pyetjeve të gazetarëve:
– Aleksandar, kjo është përvoja juaj e dytë jashtë vendit tuaj teksa më parë keni luajtur në Bullgari dhe tashmë në Shqipëri. Cili është ndryshimi mes këtyre kampionateve?
Kam luajtur më parë në Bullgari dhe atje futbolli ishte më teknik, ndërkohë që në Shqipëri shoh që luhet fort edhe fizikisht, është një futboll më agresiv, duhet të vraposh shumë dhe të përplasesh shumë.
-Përse erdhët te Vllaznia?
Erdha te Vllaznia për t’iu bashkuar një projekti të ri, me trajner të ri, drejtor të ri, president të ri. Kam lexuar për Vllazninë, e di që është një klub i madh dhe shpresoj që të kthehet sa më shpejt aty ku kjo skuadër flitet se ka qenë më përpara. Kuptohet që kjo nuk është diçka që mund të ndodhë menjëherë, por do kohën e vet.
-Sa ka ndikuar tek ju në aspektin e formës zgjatja e nisjes së kampionatit për shkak të bojkotit?
Në një aspekt, bojkoti i kampionatit na ndihmoi sepse në ekip erdhën shumë lojtarë të rinj të cilët kishin nevojë për përgatitje fizike e teknike, por nga ana tjetër sigurisht që kemi mbetur në ankth sepse nuk e dinim kur do të fillonim, megjithatë detyra jonë është të stërvitemi dhe të jemi gjithmonë gati për të luajtur.
-Vllaznia për fitore nesër ndaj Skënderbeut?
Ne do të shkojmë drejt Korçës për të luftuar për tre pikë, por e dini që ky është futboll dhe gjithçka mund të ndodhë, por ne do luajmë për fitore”./SHKODRA-SPORT.COM/
