Skuadra e Vllaznisë në mundje para viteve ’90 ishte një ekip i cili nxori emra të mëdhenj të sportit shqiptar por edhe ndërkombëtar. Një prej atyre që nderoi emrin e qytetit është ish mundësi Tonin Dema i cili festoi në një ditë të veçantë 65 vjetorin e lindjes.
Në një aktivitet festiv me miqtë e tij të sportit por edhe më gjërë Dema përjetoi emocione të mëdha duke kujtuar me nostalgji vitet e sportit.
Shumë emra të mëdhenj jo vetëm të sportit të mundjes erdhën për të nderuar Tonin Demën në 65 vjetorin e lindjes ndërsa e kujtojnë për cilësitë e veçanta si sportist por edhe në shumë sfera të jetës.
Tonin Dema lindi në 1 gusht të vitit 1955 ndërsa që i vogël nisi sportin. Është 5 herë kampion i Shqipërisë në mundjen e lirë në vitet 1976, 1977, 1979, 1980, 1983. Ka fituar Medalje Ari në Spartakiadën e tretë Kombëtare në vitin 1979 ndërsa numëron 14 trofe ekipore me Vllazninë.
Për dy vite ishte trajner i të rinjve të mundjes duke fituar Kupën dhe Kampionatin ndërsa për 7 vite kontribuoi edhe si trajner i boksit. Është “Mjështër i Merituar i Sportit” akorduar në vitin 1995.
Tonin Dema në vitet ’90 është një aktivist dhe organizator i ngjarjes historike të tentativës për rrëzimin e bustit të Stalinit në Shkodër për të cilën edhe u burgos ndërsa mban medaljen e Trimërisë dhënë nga Presidenti i asokohe Sali Berisha. Në vitin 1997 emigroi në Itali ku qëndroi për shumë vite./STAR-PLUS/
