Lënia në stol e Arsid Krujës në ndeshjen e fundit ndaj Kukësit nga ana e trajnerit Raineri, ka sjellë reagimin e ish-presidentit të Vllaznisë Roberto Nava. Ky i fundit kishte ditë që kishte “humbur” nga rrjeti social facebook ku ka qenë gjithmonë aktiv, por është shfaqur dje me një akuzë ndaj trajnerit të kuqebluve. “Kruja, talenti më i mirë i ri shqiptar, 300 mijë eurosh, lojtari i Kombëtares U-21, nuk luan më. Vafsh në djall Baldo! Sepse duhet të luajë kush paguan. Po çfarë lloj futbolli është ky? Një futboll lypsash të vërtetë”! Raportet në mes Navës dhe Rainerit në fakt ka kohë që nuk janë të mira. E çuditshme në fakt por pak ditë më parë, në një gazetë zviceriane, gjatë një interviste me ish-presidentin e klubit shkodran, ai do të fliste me superlativa për punën e trajnerit që kishte zgjedhur në korrik të këtij viti për të drejtuar Vllazninë. Tani, flet ndryshe. Kuptohet që mund të jetë një çështje për Navën që në Kukës nuk ka luajtur Kruja, por jo vetëm ai. Nuk ka luajtur as Soza që erdhi me shumë bujë, nuk ka luajtur as Hajdari që është një nga lojtarët më të paguar, nuk ka luajtur as portieri Selimaj dhe askush nuk u ankua. Vetëm Nava ankohet megjithatë Vllaznia pavarësisht këtyre ndryshime në formacion, duhet pranuar se ka bërë një paraqitje deri diku të mirë. Ndoshta edhe në ndeshjen e rradhës me Teutën mund të ketë sërish ndryshime në formacion por kjo duhet parë deri ditën e dielë.
© shkodrasport.com
