Humbja në derbi dhe marrëdhënia joekzistuese tashmë me shumë lojtarë duket se i ka dhënë fund eksperiencës së brazilianit Ze Maria në pankinën e Tiranës. Mbeten për t’u përcaktuar detajet e “divorcit” mes palëve, por tashmë është thuajse e sigurt lamtumira e tij në ditët në vazhdim.
Vip Sport ka mësuar nga burime të sigurta se Tirana tashmë e sheh si të larguar përfundimisht teknikun. Ndaj bardheblutë kanë filluar kontaktet dhe kanë gjetur edhe pasardhësin e tij.
Ai është Ernest Gjoka, një emër që ka qarkulluar shpesh në ambientet bardheblu, por për të cilin nuk ka pasur asnjëherë një ofertë konkrete për të marrë drejtimin e skuadrës.
Të njëjtat burime bëjnë të ditur se tashmë mbetet zyrtarizimi i largimit të Ze Marias, pasi duhet gjetur gjuha e përbashkët për prishjen e marrëveshjes me të, para se të zyrtarizohet edhe firma e Gjokës dhe emërimi i tij në bankinën e bardhebluve.
Një ditë para derbit të së premtes, trajneri i cili së fundmi ka drejtuar Kukësin e Vllazninë, postonte në rrjetet sociale një foto të Tiranës së shumë viteve më parë, atë të sezonit 1964-1964, pjesë e të cilës kishte qenë edhe babai i tij. /vipsport/
