Jurgen Klop u shpall ditën e djeshme si trajneri më i mirë në botë për arritjet e sezonit të kaluar. Trajneri gjerman triumfoi në Ligën e Kampionëve me Liverpulin, ndërsa ky çmim vjen edhe si një shpërblim për arritjet e tij gjatë karrierës duke nisur nga Mainci dhe Borusia Dortmund.
Klop njihet si një trajner shumë pasionant dhe ka një mënyrë të veçantë rreth konceptimit të futbollit. Klop gjithashtu njihet si motivues i madhe dhe trajneri i Liverpulit ka treguar si e motivoi ish-skuadrën e tij Dortmundin para ndeshjes me Bajern Mynih. Klop përdori si shembull filmin e Roki Balbao, për të shpjeguar se gjithnjë mund t’ia dalësh, por rrugës pati të papritura.
“ Kthehemi pas në vitin 2011. Borusia ime luante një ndeshje të rëndësishme në kampionat përballë Bajernit. Nuk kishim fituar në transfertën e Mynih prej diku 20 viteve.
Unë inspirohem shumë prej filmave, kështu kur mendova të motivoja djemtë, më shkoi në mendje Roki Balboa. Mendoj se edhe në shkolla duhet të shfaqin filmat e tij, Roki 1,2,3,4. Nëse shikon këtë film dhe nuk ke dëshirë për t’u ngjitur në majë të malit, atëherë diçka nuk shkon me ty.
Kështu, një natë para ndeshjes, mblodha lojtarët në hotel për të folur. Djemtë ishin të gjithë të ulur. Dritat ishin fikur dhe iu tregova situatën. Herën e fundit që Dortmundi ka fituar në Mynih, shumë prej jush keni qenë në pelena. Pastaj fillova të tregoja disa skena nga filmi Roki 4.
Pjesën kur kundërshtari i Rokit, Drago stërvitet në pistë vrapimi dhe është i lidhur me monitorin e një kompjuteri dhe shkencëtarët e studiojnë, Dhe iu thashë djemve, “ E shikoni këtë? Bajern Mynih është Drago. Më i miri në gjithçka. Ka teknologjinë më të mirë, makineritë më të mira. Ai është i pandalshëm”. Pastaj, është Roki duke u stërvitur në Siberi në të ftohtë duke vrapuar në majë të malit. Dhe i thashë djemve,
“ Ky jemi ne. Ne jemi Roki. Ne jemi më të vegjël, por kemi pasionin. Kemi shpirtin e një kampioni. Mund të bëjmë të pamundurën”! Po vazhdoja të flisja por pashë reagimin e futbolistëve dhe prisja që të lëviznin nga karrigia, të motivuar. Por, thjesht qëndronin ulur.
Pastaj kuptova se Roki 4 ka dalë në vitin 1980. Pyeti se kush e njihte Rokin dhe vetëm dy lojtarë e dinin. Komplet fjalimi im nuk bëri asnjë sens. Duhet të filloja një tjetër. Megjithatë fituam 1-3 por tani nuk e mbaj mend nëse e bëra këtë fjalim para ndeshjes, dhe kjo me shumë mundësi bën një tjetër histori të bukur”, u shpreh Klop./vipsport/
