Safet Gjici ka treguar sot në konferencën e paralajmëruar për shtyp se i ka kërkuar skuadrës që të mundohet të sigurojë 4 fitore radhazi, pasi kështu do të sigurojë premio, ndërsa nuk do të ketë asnjë nga gjobat e famshme me të cilat ka ndëshkuar ekipin kur nuk siguronte rezultate.
“Trajneri ka qenë pushim ditën pas ndeshjes, ishte në Shkodër si zakonisht. Tani vijon punën, nuk ka pasur vendim për ta larguar. Ai ka besimin tim absolut, sepse loja nuk ka qenë e keqe, përtej rezultateve. Loja po përmirësohet ndeshje pas ndeshje. E patë vetë në Durrës që luajtëm shumë mirë, mund të na jepej një penallti, ashtu si edhe për Teutën.
Ndoshta edhe arbitri e humbi qetësinë. Klubi nuk ka marrë asnjë vendim për trajnerin, përndryshe do ta kishim zyrtarizuar ne, si klub, jo mediat. Unë i marr vendimet pa ndikimin e askujt dhe nuk pushohet trajneri nga mediat. Kam biseduar sot me trajnerin dhe lojtarët, sepse edhe ata kanë përgjegjësi. Duhet qetësi e madhe për ndeshjet e ardhshme”, tha fillimisht Gjici.
Ai ka treguar se shqetësimi i tij më i madh për momentin është udhëtimi Shkodër-Tiranë që bën çdo ditë tekniku i skuadrës. “I kam kërkuar Cungut të jetojë në Tiranë, nuk është normale ta bëjë vajtje-ardhje për në Shkodër. Ka pasur jo pak probleme, që do t’i zgjidhim.
Por skuadra është cilësore, blerjet janë të shkëlqyera. Në Durrës më zhgënjeu mbrojtja, është e papranueshme që humbëm ashtu, duke pësuar 2 gola ne 3 minuta. Skuadra ka eksperiencë, disa lojtarë janë kampionë.
Duhet kohë për të gjetur ekuilibra. Nuk jam plotësisht i kënaqur nga afrimet e janarit, duhet të bëjnë më shumë. Edhe Rexhinaldo me Shkurtajn mund të luajnë bashkë”.
Ndërkohë, ai nuk ngurroi të lëshonte edhe thumbin e radhës ndaj rivalëve për titull. “Jemi 3 ekipe për titull, edhe Teuta ndonëse sillet si “nëndetëse”. Partizani merret vetëm me ne. Kemi bërë marrëveshje me lojtarët dhe duam 4 fitore rresht.
Nuk kam vendosur gjoba, përkundrazi, do të ketë premio nëse arrijmë objektivin në ndeshet e radhës. Titulli kampion është akoma i mundur, ka shumë ndeshje dhe Partizani do ketë momente ku do gabojë”, ishte premtimi i tij. /vipsport/
