Armando Broja e ka nisur në mënyrën më të mirë të mundshme aventurën e tij te skuadra e Sauthempton. Sulmuesi shqiptar ka shënuar që në minutat e parë të debutimit të tij me klubin e Premier Ligës ku është huazuar nga Çelsi.
Në ndeshjen e Kupës së Ligës ndaj Njuport, Broja ishte rreshtuar mes titullarëve nga trajneri Ralf Hasenhutl, për të treguar formën e tij dhe ai nuk ka zhgënjyer.
Që në minutën e 9 të sfidës, sulmuesi me origjine nga Malesia e Madhe ka tundur rrjetën duke i dhënë avantazhin skuadrës së tij në këtë sfidë.
Ai tregoi nuhatje të mirë para portës pasi një gjuajtje e Redmond u ndal nga traversa dhe ai ndoqi aksionin e shtyu në rrjetë topin që u kthye në lojë.
Një gol i cili do të ndihmojë padyshim Brojën që të gjejë më shumë hapësira te Sauthempton, ku nuk kishte luajtur në javët e para të kampionatit.
