Katër vite më parë ishte një hero me kombëtaren e Gjermanisë, por rezultatet zhgënjyese në dy vitet e fundit kanë bërë që trajneri Joachim Low të mendojë largimin, duke parë për alternativa të tjera. Trajneri 58-vjeçar kupton se aventura e tij në krye të Gjermanisë është drejt fundit, gjë të cilën ai e ka konfirmuar në një intervistë për televizonin ZDF. “Koha më e madhe e karrierës time me kombëtaren e Gjermanisë ka kaluar”, është shprehur Low.
“Mbërrin një moment kur duhet të mendosh se çfarë do të bësh në të ardhmen dhe unë jam gjithnjë e më shumë i interesuar për të drejtuar një klub. Madje mendoj se do të drejtoj një ekip që nuk luan në Gjermani, por jashtë saj”, tha më tej trajneri i kombëtares gjermane, kontrata e të cilit në krye të këtij ekipi skadon në vitin 2020.
Eliminimi i shpejtë në Botërorin e Rusisë dhe paraqitja jo e mirë në Nations League kanë përshpejtuar këtë tërheqje të tij nga kombëtarja, në të cilën ndohet që prej vitit 2006. Para Botërorit në Rusi ai ishte kontaktuar nga drejtuesit e Real Madrid, si zëvendësuesi i Zinedine Zidane, por asokohe Low nuk preferoi të largohej nga Kombëtarja. Ndoshta ky është momenti i duhur për ta bërë këtë gjë: “Real Madrid? Është një klub interesant për çdo trajner”, tha Low.
