Skuadra e futbollit të Femrave “Juban Danja” duket se këtë vit do të jetë një kandidate serioze për fitimin e trofeve në vend. Këtë gjë e kanë treguar mësëmiri vajzat e Jubanit të cilat i kanë bërë një nisje shumë të mirë Kampionatit të Futbollit të femrave. Në tre javët e para kanë korrur suskes teksa kanë marrë tre fitore dhe tashmë kryesojnë kampionatin me 9 pikë të plota. Kjo ecuri pozitive ka sjellë edhe frytet e veta. “Juban Danja” vetëm një ditë më parë ka marrë një fond nga Bashkia Vau Dejës. Janë rreth 2 milionë lektë të vjetra që janë akorduar nga ajo Bashki për këtë ekip. Ndoshta jo ndonjë shumë tepër e madhe, por është e mjaftueshme për ta ndihmuar këtë skuadër apo për t’i dhënë më shumë kurajo vajzave futbolliste. Bashkia Vau Dejes nuk është e vetmja. Kohët e fundit, pikërisht pas ndeshjes së parë që zhvilloi Jubani, një donator që pëlqen të mos jetë public është afruar teksa ka dhënë premio dhe ka shprehur dëshirën e gatishmërinë e tij për të financuar për këtë skuadër këtë sezon. Duke parë këto financime dhe mbështetjen e Presidentit të apasionuar Ferdinand Jaku, “Juban Danja” patjetër që këtë vit do të kërkojë fitimin e trofeve si të kampionatit ashtu edhe të Kupës. Një sezon më parë Jubani ishte finaliste e Kupës por në finale u mund nga Ada. Kësaj here duket se gjërat kanë ndryshuar dhe se “Juban Danja” do të shfaqet fuqishëm për të qenë ajo skuadra e sukseseve këtë vit edhe pse ka goxha konkurence nga Ada apo Tirana As.
