Imagjinoni një skuadër në qendër të mbrojtjes me Van Dajk dhe Kulibali. Liverpul njërin e ka në skuadër dhe i gëzohet aftësive të tij dhe tjetrin dëshiron ta marrë gjatë kësaj vere.
Kalidu Kulibali është në shitje dhe Napoli prej kohësh pret oferta për senegalezin. Madje Amir Rrahmani është blerë nga Verona në merkaton e dimrit pikërisht për të zëvendësuar 28-vjeçarin.
Prej muajsh diskutohet një kalim i Kulibali te PSG, por duket se francezët do të kenë një konkurencë shumë të fortë në këtë operacion. Jurgen Klop nuk është i kënaqur nga paraqitjet e partnerëve të Van Dajk në mbrojtje dhe dëshiron të marrë dikë të ngjashëm me forcën dhe saktësinë e tij.
Xho Gomez, Joel Matip apo Dejan Lovren nuk kanë bindur dhe pritet që njëri prej tyre të largohet. Një mundësi është përfshirja në operacionin e ardhjes së Kulibali.
Napoli është i gatshëm të privohet nga shërbimet e mbrojtësit më të mirë të skuadrës, por jo pa kënaqur oreksin ekonomik të De Laurentis. Presidenti napolitan kërkon një shifër që i afrohet 100 milionë eurove për senegalezin. /vipsport/
