Një tjetër futbollist i talentuar shkodran “zbulohet” se po rritet në Itali. Pas rastit të publikuar ditën e djeshme të Anis Gurit që ka firmosur për Chievon, mësohet se në tjetër shkodran ka nisur të spikasë po në qytetin e Veronas.
Dhe këtë herë jo tek klubi i mësipërm por tek “Hellas Verona”. Bëhet fjalë për Jurgen Pecin, mesfushorin me tipare sulmuese për të cilin kanë nisur që tani interesimi nga klubë të mëdha si Milan, Sampdoria etj.
I datëlindjes 02 janar 2007, Jurgeni e ka nisur futbollin para pesë vitesh duke luajtur me ekipe provinciale. Aty bie në sy dhe janë drejtuesit e Akademisë së Viçensës të cilët e marrin dhe e bëjnë pjesë të tyre por vetëm përkohësisht.
Një vit më parë ka qenë “Hellas Verona” që ka blerë kartonin dhe Peci ka firmosur për ta. Ky është sezoni i dytë që futbollisti i vogël shkodran po luan me ekipin e tij aktual dhe me të ka marrë pjesë edhe në disa turne ndërkombëtarë.
Në një prej tyre të zhvilluar pak muaj më parë në Barcelonë të Spanjës, në mes 700 fëmijëve pjesmarrës, Jurgen Peci ka marrë kupën e golashënuesit më të mirë të aktivitetit.
Diçka interesante sepse nuk kemi të bëjmë me një sulmues të mirëfilltë por me një “trekuartist”, i cili gjithsesi e njeh mirë portën dhe shënon shumë gola.
Sigurisht që mosha e tij e vogël nuk lë vend për parashikime për të ardhmen e këtij futbollisti, por të dhënat e tij janë për t’u evidentuar.
Prindërit e Jurgenit natyrisht që presin gradualisht që bashkë me rritjen e moshës së djalit të tyre, të vijë edhe ftesa për grumbullimin e tij me ekipet kombëtare të moshave të Shqipërisë.
© shkodrasport.com
