Pas dëmtimit që e detyroi të linte fushën para kohe në sfidën e djeshme ndaj Lacios, mbrojtësi i Juventusit, Leonardo Bonuçi rrezikon seriozisht pjesëmarrjen në sfidën e parë të Ligës së Kampionëve kundër Atletiko Madrid në program për t’u luajtur më 20 shkurt.
Nga analizat e kryera rezulton se 31-vjeçari ka pësuar një dëmtim serioz në kaviljen e djathtë teksa mësohet se mbrojtësi ka nisur menjëherë fazën e rikuperimit. Megjithatë, klubi i Juventusit nuk ka publikuar kohën që do t’i duhet mbrojtësit për t’u rikthyer në dispozicion të teknikut Alegri. Ndërkohë, stafi mjekësor i kampionëve të Italisë do të mundohen të bëjnë të pamundurën për rikuperimin në kohë të Bonuçit në një ndeshje të rëndësishme si ajo ndaj Atletikos në “Uanda Metropolitano”.
Në rast se Bonuçi nuk ia del të jetë i gatshëm, atëherë “Zonja e Vjetër”, pas largimit të Benatias, do të duhet t’i besojë Daniele Ruganit që në këtë sezon është aktivizuar me pikatore në formacionin bardhezi por që ka dhënë përgjigjet se është gati të shfaqë potencialin e tij. /VipSport/
