Kilian Mbape u afrua me bujë të madhe në Madrid, por transferimi i tij nuk po shkon në mënyrën që pritej. Sulmuesi francez ka humbur shkëlqimin e tij dhe nuk po arrin të përshtatet dot te Reali.
Në një intervistë të dhënë për “France Football”, Mishel Platinija ka thënë se e sheh bashkëkombasin e tij të humbur në fushë. Ai ka këshilluar Mbapenë se kampionët e mëdhenj duhet të ngrihen nga hiri.
“E shikoj të humbur në fushë. Gjithsesi, kampionët e mëdhenj duhet të ngrihen nga hiri. Kjo është ajo që do ta bëjë Mbapenë një kampion të madh. Kam besim që ky është vetëm një hap i vogël pas për të dhe për futbollin francez”, është shprehur Mishel Platinija./Sport Ekspres/
