Kategoria Superiore ka ardhur në një fazë shumë të rëndësishme dhe kalendari është mjaft i ngjeshur. Skuadrave u duhet të luajnë një ndeshje në çdo tre ditë, diçka që nuk e kanë bërë shpesh dhe e kanë të vështirë ta përballojnë.
Ndeshjet e Kupës dhe shpeshtimi i sfidave në kampionat ka lënë me pasoja një pjesë të mirë të skuadrave. Lojtarët më të mirë të ekipeve janë ata që e vuajnë më shumë këtë intensitet të lartë për faktin se ata duhet të jenë gjithmonë në fushë dhe kanë luajtur më shumë minuta se pjesa më e madhe e skuadrës.
Tirana është një nga skuadrat më në vështirësi për shkak të dëmtimit të Kale dhe ndëshkimit me kartonë. Braziliani ka një problem në shpatull dhe nuk dihet ende se kur do të kthehet. Edhe te Kukësi nuk qëndrojnë mbrapa. Verilindorët në çdo javë duhet të bëjnë pas një apo dy lojtarë të formacionit të parë dhe kështu do vazhdojë të ndodhë edhe në javën e ardhshme.
Vasil Shkurtaj pësoi një dëmtim në barazimin e djeshëm kundër Vllaznisë dhe mund të mungojë për disa javë, ndërkohë Musolli ka një dëmtim në fytyrë dhe kokë. Edhe kundërshtari më i madh i Shkurtaj në garën për Këpucën e Artë, Nuabueze ka probleme fizike dhe ka shqetësuar trajnerin Cungu, që pritet të mos e ketë në dispozicion sulmuesin në një ndeshje si ajo me Tiranën.
Kallaku ishte heroi i Teutës në dy ndeshjet e fundit, por tashmë sulmuesit do i duhet të ndalet në infermieri. Te Partizani përveç krizës do duhet të përballojnë edhe mungesën e lojtarit më të mirë të skuadrës, Lorenc Trashi.
Mbrojtësi është dëmtuar që në ndeshjen me Bylisin dhe pritet të mungojë edhe disa javë. Jurgen Goxha gjithashtu është një nga “viktimat” e kalendarit të ngjeshur. Mbrojtësi ka pësuar një çarje në kokë, që e detyroi të qëndrojë jashtë fushave në ndeshjen me Laçin. Kaq shumë dëmtime dhe pak kohë për të rikuperuar. /vipsport/
