Është mbyllur me sukses edicioni i parë për Kampionatin Kombëtar Rajonal, i cili ngriti sipar në datën 15 qershor 2017 për moshat U-17, U-15 dhe U-13, me pjesemarrjen e 18 përfaqësueseve nga të gjitha zonat rajonale të Shqipërise. Ky kampionat do të shndërrohet në një traditë të përcdovitshme me të gjithë ekipet kombëtare të moshave rajonale, të cilët gjatë gjithë sezonit ezaurojnë një volum pune të jashtëzakonshëm dhe që kalojnë në disa faza selektimi deri në konfigurimin e plotë të ekipeve kombëtare.
Në këtë kampionat kanë marrë pjesë edhe tre ekipet e Zonës së Shkodrës që drejtohen nga emrat e njohur Edi Martini, Vioresin Sinani dhe Elvin Beqiri. Por nëse me kampionatet e klubeve, ekipet e Shkodrës dhe sidomos ato të Vllaznisë kanë patur sukses, nuk ka ndodhur e njëjta gjë me këto kombëtare sepse asnjëri prej tyre nuk është shpallur kampion. Ekipi U-17 i drejtuar nga Edi Martini është renditur në vendin e tretë me 9 pikë të grumbulluar me 3 fitore dhe 2 humbje të pësuara.Ekipi U-15 i drejtuar nga Sinani ka grumbulluar vetëm 5 pikë duke u renditur në vendin e katërt me 1 fitore, 2 barazime dhe 2 humbje. Sakaq ekipi U-13 i drejtuar nga Beqiri është renditur edhe më poshtë, në vendin e pestë me vetëm 2 pikë të arritura me dy barazime dhe 3 humbje. Këto rezultate në njëfarë mënyrë vërtetojnë atë se seleksionimi i bërë nga përfaqësuesit e FSHF-së nuk ka qenë ai i duhur dhe pjesë e këtyre ekipeve kombëtare në Zonën e Shkodrës mund të mos kenë qenë futbollistët më të mirë.
© shkodrasport.com
