Një lajm i mirë për sportin e peshëngritjes. Kampionati i ardhshëm Europian i peshëngritjes për të rritur, do të zhvillohet në Tiranë në datat 5-14 prill të vitit të ardhshëm. Vendimi është marrë nga Federata Europiane ditët e fundit gjatë Kongresit Botëror që u zhvillua në Azerbajxhan këto ditë. Lajmi është konfirmuar nga sekretari i Federatës Shqiptare të Peshëngritjes, shkodrani Ilir Kraja. Në fakt, ky kampionat ka qenë i planifikuar të zhvillohej në Varna të Bullgarisë por bullgarët janë tërhequr.
Dhe nga kjo ka përfituar Shqipëria që ka marrë përsipër organizimin e këtij evenimenti shumë të rëndësishëm. Europiani vjen në momentin e duhur në mënyrë që harrohet edhe ai imazh që u krijua me disa raste antidopingu të sportistëve tanë. Në këtë mënyrë, tashmë duhet parë se çfarë jemi në gjendje të bëjmë për organizimin sa më të mirë të këtij Europiani ku natyrisht që disa prej sportistëve tanë do pretendojnë edhe për fitimin e medaljeve.Nëse do ndodhte kjo sigurisht që do ishte një lajm i mirë për peshëngritjen shqiptare para syve të gjithë Europës.
www.shkodrasport.com
