Dita e parë e kampionatit kombëtar të atletikës për të rritur, ka shkuar në mënyrën e duhur për ekipin e Vllaznisë.
Siç kemi bërë të ditur, ai pretendon të fitojë titullin e 10-të kampion rradhazi dhe me rezultatet e arritura sot, kjo gjë duket shumë pranë.
Kështu, ekipi shkodran ka arritur të zërë disa vende të para.
Në garën e 100 metrave, Izmir Smajlaj ka zënë vendin e parë duke u shpall kampion dhe duke lënë në vend të dytë dhe të tretë dy atletët e tjerë të Vllaznisë, Edison Çardaku dhe Ravio Rama.
Në 400 metra kampion është shpallur Franko Burraj. Ndërkohë në garën e kërcimit trehapësh, surprizë ka qenë ndoshta shpallja kampion e Muhamet Çengelit që pak ditë më parë u shpall kampion edhe me 20 vjeçarët.
Vend të parë ekipi shkodran ka zënë edhe në stafetën 4 x100 m me atletët Muhamet Çengeli, Lulëzim Çengeli, Daniel Guri dhe Franko Burraj.
Nesër pritet që Vllaznia të zërë vendin e parë edhe në garat e 110 m/p, në 200 m dhe në kërcim së gjati.
Me rezultatet e arritura sot, Vllaznia duket shumë pranë shpalljes kampion edhe për këtë vit.
© shkodrasport.com
