Kamza vazhdon momentin fantastik në Superiore, edhe pse është skuadër debutuese. Në javën e 13-të të kampionatit, skuadra e drejtuar nga Ramadan Ndreu ka dalë me tri pikë tepër të çmuara, me aromë kreu, nga transferta durrsake. Zhgënjen, kësisoji, Teuta në ndeshjen hapëse të këtij “stacioni” të garës, duke rikthyer makthet e javëve më parë, kur Magani detyrohej edhe të jepte dorëheqjen, pavarësisht se nuk do të pranohej nga presidenca.
Një lojë e hapur dhe e fortë në “Niko Dovana”, me durrsakët më kërkues e këmbëngulës gjatë tërë kohës, ndërsa miqtë janë shfaqur pragmatistë dhe të mirëvendosur në fushë. Minuta e 28-të e këtij ballafaqimi ka qenë përcaktuese, sepse asokohe është shënuar goli i vetëm, me autor Racic. Sulmuesi serb i Kamzës ka shfrytëzuar një hezitim të prapavijës bregdetare dhe ka goditur në mënyrë spektakolare në hyrje të zonës. Topi ka përfunduar në rrjetën e Kastratit, i paaftë të bëjë diçka për të evituar disavantazhin. Ky moment i ka çliruar psikologjikisht të besuarit e Ndreut, ndërsa ka bërë të kundërtën për Teutën.Magani mundohet t’i orientojë të tijtë në sulm, në kërkim të barazimit, por u mungon qartësia në organizim dhe saktësia në finalizim. Mbrojtja e Kamzës është e përforcuar dhe ia del t’i mbajë “djemtë e detit” larg portës së vet. Durrsakët do të mbeteshin me një lojtar më pak në fushë nga minuta e 58-të, kur Dediç ndëshkohet me karton të kuq, pasi godet me bërryl Arrabal gjatë një dueli në mesfushë. Më tej, lojtarët e Teutës pretendojnë në dy raste për penallti, por kryesori Hamiti nuk është i këtij mendimi.
Kamzalinjtë ndërhyjnë me zëvendësime, duke freskuar skuadrën dhe ruajtur qasjen gati heroike në difensivë, pa e lejuar kundërshtarin të shënojë qoftë edhe një gol të vetëm, për të barazuar.
Në përfundim të 90 minutave fiksohet rezultati 1-0 për miqtë, që festojnë një sukses të merituar dhe rrisin oreksin për Kupat e Europës, ndoshta më shumë se kurrë. Me këtë fitore në transfertë, Kamza ngjitet në kuotën e 23 pikëve, duke u pozicionuar përkohësisht në vendin e dytë, derisa të luajnë edhe Kukësi me Flamurtarin, ndërsa Teuta mbetet me 13 pikë, në vendin e shtatë.
© shkodrasport.com
