Trajneri i Kamzës, Ernest Gjoka, pas barazimit me Teutën në transfertë, në emisionin “Gol pas Goli” të Vilma Mashës në “Supersport” pas ndeshjes, deklaroi:
Erdhët për 1 pikë, dhe ia arritët qëllimit?
Padiskutim, synimi ynë sot ishte për të paktën një pikë. Bëmë interpretimin e lojës, duke pasur idenë se Teuta ka forcë fizike. Ka lojtarë të shpejtë, dhe duhej t’i mbyllnim zonat. E përgatitëm në mbrojtje, dhe të dilnim shpejt në sulm. Në pjesën e parë, patëm disa raste, por nuk shënuam. Në të dytën nuk patëm aq shumë raste. Kur i bëmë detyrat taktike, dolëm me rezultate.
Rikthimi i titullarëve…
Është bërë një pagesë, pritet që të bëhet edhe pagesa tjetër, me gjithë vështirësitë që ka presidenti. Shpresoj që të gjejë gjuhën e përbashkët me kryetarin e bashkisë. Kjo punë që bëjmë ne, nëse nuk i motivon lojtarët, nuk arrihet asgjë. Për sa kohë funksionon puna e pagave, edhe skuadra do kthehet. Edhe ata janë profesionistë.
Provuat me 3 mbrojtës, jeni i kënaqur?
Sigurisht, deri në minutën e 70-të, kur bëmë ndërrimin, ekipi bëri mirë detyrat. Nuk është e lehtë të ndërrosh nga një skemë te një tjetër. Duhen orë pune. Por, jam i kënaqur, deri kur shkuam në 5-4-1. Ne na pëlqen një skemë tjetër, që po punojmë që kur kam ardhur unë. Por meqë na mungonte Bonani, u munduam të interpretojmë kështu.
A është Kamza një satelit i Partizanit?
Absolutisht që jo, ta garantoj. Ndeshja e kaluar, me gjithë problematikat, ajo skuadër që ishte në fushë, dha maksimumin. Ne nuk kemi kohë, të bëjmë lojën e askujt. Nëse do bëhemi satelitët e dikujt, më mirë të dalim dhe të themi që ramë nga Kategoria.
Nuk guxuat për 3 pikë. Trysnia e kundërshtarit, apo ishte strategji për të mos humbur?
Të dyja bashkë. Ne donim të zinim në befasi kundërshtarin, pasi i dhamë fushë. Edhe dy qendrat e tyre të mbrojtjes, hapen shumë për të krijuar. Pjesën e parë, funksionoi, por nuk shënuam. Në të dytën më pas, ata futën më shumë sulmues, dhe nuk mund të dilnim në aventurë. Ishim të disiplinuar deri në momentet e fundit.
