Drejtuesit e Kamzës mbajnë premtimin.
Dje ekipit i janë shpërndarë 10 mijë euro për barazimin me Teutën, ndërsa i është dhënë fjala se para përballjes me Flamurtarin, do të marrin edhe 10 mijë të tjera për pikën e marrë me Vllazninë.
Dy barazimet e çmuara për garën e mbijetesës nuk mund të kalonin në heshtje prej klubit, ndaj edhe nuk janë kursyer.
Që të çojnë deri në fund misionin e nisur, kamzalinjtë janë të detyruar që të ruajnë ritmin.
Kur kanë mbetur edhe 3 javë deri në finish, të besuarit e Julian Ahmatajt duhet të bëjnë të pamundurën që të ruajnë pozitat aktuale dhe t’i largohen njëherë e mirë fundit.
Kohë për të pushuar nuk kanë, ndaj dje në orën 15:00, ekipi ka zbritur në fushë për të nisur përgatitjet për javën e 34-t.
Titullarët kryen një seancë të lehtë, ndërsa pjesa tjetër mori ngarkesa normale.
Duhet thënë që Stevan Raçiç është stërvitur i diferencuar dje.
Mister mbetet ende mosgrumbullimi për transfertën me Vllazninë.
Megjithatë, mësohet se lojtari ka pasur debate me Ahmatajn të martën, pra një ditë para se të luhej kjo ndeshje dhe ndoshta kjo ka ndikuar që ai të mbetej jashtë 18-shes.
Sakaq, dje nuk u stërvit as Erlis Frashëri, i cili edhe pse i pranishëm, nuk zbriti në fushë, për shkak të një problemi të vogël.
