Situata kaotike të Barcelona vazhdon dhe nuk duket se do të marrë fund së shpejti. Presidenti i katalanasve, Josep Maria Bartomeu, ka vendosur që të qëndrojë në detyrën e tij të paktën deri në fundjavë, kur do të zhvillohet referendumi në klub për të vendosur nëse ai dhe drejtuesit e tjerë do të jenë përsëri në detyrë.
Sot në klub u mbajt një mbledhje e drejtuesve që shqyrtuan edhe mocionin e mosbesimit që ishte ngritur kundër presidentit.
Megjtihatë, pas një mbledhje që zgjati disa orë në ambientet e klubit, Bartomeu doli përsëri nga ajo si presidenti i katalanasve, pasi vendosi të mos jepte dorëheqjen dhe të përballej me votimin e anëtarëve në referendumin që do të zhvillohet në fundjavë.
Në fakt, presidenti shpreson që votimet të shtyhen nga autoritetet shtetërore si pasojë e situatës me COVID-19, në mënyrë që të organizohet më mirë për të siguruar pushtetin e tij për një mandat tjetër. Por për momentin, më datë 1 dhe 2 nëntor në ambientet e klubit pritet të zhvillohen votimet, siç konfirmoi edhe vetë Bartimeu pas mbledhjes, ku saktësoi se kishte kërkuar shtyrjen me dy javë të tyre, por nuk kishte marrë dritën e gjelbër.
Tani shpresa e tij është te vendimi i autoriteteve lokale, për të ndaluar lëvizjen në fundjavë si pasojë e shpërthimit të COVID-19, pasi me votimin e anëtarëve, e ardhmja e tij si president nuk duket edhe aq e sigurt. /vipsport/
