Ka shënuar në minutën e 89-të golin e fitores për Vllazninë ndaj Korabit dhe sigurisht që ndjehet i lumtur për këtë gjë. Gilman Lika mbi të gjitha është i lumtur që skuadra mori një trepikësh me shumë vlerë në këtë takim të vështirë dhe prandaj do të thoshte:
“Vërtetë u gëzuam shumë për golin që shënova në fund sepse ndeshja po shkonte drejt barazimit, por në fakt, duhej të kishim shënuar 4 apo 5 gola dhe ta kishim mbyllur më herët ndeshjen. Shënuam shumë shpejt një gol, më pas morëm një 11-metërsh që nuk e realizuam dhe po ashtu kemi patur dhe 3-4 raste të tjera të pastra që duhej t’i kishim konkretizuar.
Nuk i bëmë këto dhe prandaj e çuam ndeshjen në dyshim deri në fund. E rëndësishme është që vazhdojmë rrugën tonë drejt arritjes së objektivit që kemi, ngjitjes në Superligë”.
Për momentin kuqeblutë duan që të mbajnë vendin e parë në fund të fazës së dytë duke qenë sa më shumë të shkëputur nga ndjekësit dhe vetë kapiteni Lika ka deklaruar se në fazën e dytë pikësynimi është marrja e të 27 pikëve të saj. Nëse do të ndodhte kështu, atëherë me siguri që gjërat do jenë ashtu si duhet.
© shkodrasport.com
