Në ceremoninë e pasdites së sotme organizuar në hollin e Bashkisë Shkodër përveç shpalljes së sportistëve dhe trajnerëvë më të mirë të vitit për Sportklub Vllaznia, është bërë edhe dorëzimi i titujve “Mirënjohja e Qytetit” akorduar kohët e fundit nga Këshilli Bashkiak për pesë figura të shquara të sportit shkodran në vite.
Kështu, të nderuarit kanë qenë Brahim Syka (çiklizëm), Alfred Bardeli (mundje), Xhino Mjeda (volejboll), Refik Vorfa (basketboll) dhe Selami Dani (futboll). Dy të parët nuk kanë qenë të pranishëm në këtë ceremoni pasi ndodhen jashtë vendit megjithatë titujt i kanë tërhequr familjarë të tyre.
Ndërsa tre të tjerët, Mjeda, Vorfa dhe Dani janë parë tejet të emocionuar në momentet e marrjes së tyre duke u ndjerë vëtetë të vlerësuar.
“Kam marrë tituj të tjerë nga Ministria e Federata por më mungonte një titull nga qyteti jem i dashur dhe sot erdhi edhe ai, madje kjo ishte “qershia mbi tortë” e të gjithë nderimeve që më janë bërë. Ndihem vërtetë i vlerësuar është shprehur ish- futbollisti i njohur i Vllaznisë së viteve ’60 Selami Dani.
© shkodrasport.com
