Kina kërkon të bëhet superfuqi në futbollin botëror. Por me sa duket në Azi kanë kuptuar se nuk mund të bëhet e tillë sado milionë euro të paguajë për trajnerë apo lojtarë të njohur që të luajnë në kampionatin vendas.
Ata kanë kuptuar se duhet që lojtarët kinezë të fillojnë të përballen me kulturën dhe kampionatet më të forta në botë, ndaj për këtë arsye, po investohet për “eksportin” e futbollistëve kinezë në vende të tjera.
Eksperimenti me kategorinë e katërt gjermane dështoi, pasi skuadrat gjermane dhe tifozët iu kundërvunë ashpër planit që një ekip i përbërë nga lojtarë kinezë të luante në kampionatin e këtij vendi.
Ndaj ka filluar”pushtimi” i kampionateve të tjera të profilit më të ulët, duke filluar nga Kroacia, një vend i cili prodhon vazhdimisht talente, siç tregoi edhe fakti që arritën deri në finalen e Botërorit.
Vendimi më i fundit nga Federata e Futbollit të Kinës është mbledhja e 55 talenteve të reja kinezë, dere në moshën 25-vjeçare, në një kamp stërvitor për të përmirësuar gjendjen e tyre fizike.
Lojtarët u janë marrë pa leje skuadrave përkatëse në kampionatin kinez, diçka normale në këtë vend. Mes tyre do të përzgjidhen lojtarët të cilët do të krijojnë ekipin i cili do të regjistrohet si pjesëmarrës në kampionatin kroat, sigurisht në kategoritë e ulëta.
Federatat kanë akord mes palëve dhe plani është miratuar, pritet vetëm krijimi i ekipit dhe regjistrimi i tij në kampionatin kroat, në mënyrë që kinezët të mësohen me futbollin europian e këto dije më pas t’i vënë në punë në kampionatin vendas dhe në kombëtaren e cila nuk shquhet për rezultate të rëndësishme në skenën ndërkombëtare. /vipsport/
