Përballja mes Tiranës dhe Vllaznisë nuk luhet vetëm në fushë, por edhe në shkallët e tifozërisë. Nga sa mësohet, interesimi i tifozërisë kuqeblu është i madh për “Klasiken” e fundjavës.
Biletat do të dalin në treg së shpejti dhe pritet të ketë një interesim të lartë. Në Tiranë të shtunën në duelin kundër vendasve, në tribunat e “Selman Stërmasit” pritet të ketë një numër të konsiderueshëm tifozësh shkodranë.
Në fakt, një organizim model nga tifozët shkodranë dhe grupimi “Vllaznit Ultras” ishte bërë në ndeshjen Tirana-Vllaznia në sezonin e kaluar, në janar të këtij viti, kur takimi përfundoi me rrjeta të paprekura, 0-0. Ndoshta, në një masë të tillë në transfertë, ai organizim mungonte prej vitesh, teksa pse jo të mos realizohet edhe të shtunën një gjë e tillë.
Dueli nuk do të jetë vetëm në fushën e lojës mes futbollistëve, por si gjithmonë edhe në tribuna mes tifozërive. Edhe një herë tifozët shkodranë kërkojnë t’i japin mbështetjen maksimale ekipit të tyre të zemrës në një përballje jo vetëm të vështirë, por edhe që mund të jetë e vlefshme për vazhdimësinë e sezonit drejt synimeve të titullit kampion.
Maringlen ZHIVANI
