Trajneri i Partizanit, Klevis Dalipi, kërkon suksesin e dytë radhazi në stolin e kuq, pas fitores me Luftëtarin pak ditë më parë. Ai foli në konferencën e zakonshme për shtyp për transfertën me Vllazninë dhe gjendjen e skuadrës që drejton:
“Jemi të vetëdijshëm se Vllaznia ka treguar rritje në lojë dhe rezultate në ndeshjet e fundit, për më tepër që ka afruar një nga sulmuesit më të mirë të kampionatit, Xhevahir Sukajn.
Ne jemi përgatitur më së miri, e dimë shkallën e vështirësisë që paraqet kjo ndeshje, që brenda 90 minutave do të rezervojë shumë episode.
Shpresojmë që këto episode të jenë në krahun tonë dhe të dalim në lojën që kërkojmë ne, duke ditur që edhe terreni i stadiumit “Loro Boriçi” ta lejon diçka të tillë.
Vllaznia është një skuadër që lufton për mbijetesë dhe pikët janë jetike për të, por ne kemi objektivin tonë dhe shkojmë në Shkodër për fitore.
Ditëlindja? Nuk e kisha parashikuar kurrë që dy ditë para ditlindjes do të emërohesha në drejtimin e skuadrës.
Sigurisht që do të ishte kënaqësi për mua, por ajo që dëshiroj më tepër në këtë moment është të bëjë më të mirën dhe skuadra të ecë përpara dhe të arrijë objektivat.
Vijmë nga një ndeshje shumë e mirë me Luftëtarin, që kishte plot 11 javë që nuk pësonte humbje. Shpresoj që edhe në ballafaqimin e radhës lojtarët të shprehen më së miri dhe të dhurojnë të njëjtën paraqitje si ndaj Luftëtarit.
E përsëris që kam shumë besim te lojtarët, duke ditur që kam kohë që punoj me këtë grup. Shpresoj që sulmi të bëjë atë që di të bëj më mirë dhe të arrijmë rezultatin e dëshiruar.
Formacioni? Nuk besoj se skuadra do të ketë ndryshime, do të zbresë në fushë ai formacion që triumfoi ndaj Luftëtarit.
Ne kemi në përbërje një grup shumë të mirë lojtarësh dhe për këtë fakt kam vështirësi edhe për të përzgjedhur 18 lojtarët, që do të grumbulloj ndaj Vllaznisë.
Skuadra nuk do të pësojë ndryshime, por e rëndësishme është të funksionojë dyshja e mesfushës Batha–Mala, që bëri një ndeshje të mrekullueshme me Luftëtarin.
Fejzullahi vijon të jetë në fazën e riaftësimit dhe ende nuk është 100% i gatshëm për të përballuar një ndeshje të vërtetë.
Mendojmë që në vazhdimësi të aktivizohet te Partizani B në mënyrë që të marrë minuta për të qenë më pas gati për ekipin e parë.
E pranova ftesën e Presidentit Demi, pasi e di se skuadra ka shumë për të dhënë dhe jemi shumë afër objektivit të Europës.
Tashmë çdo gjë mbetet në dorën tonë, ndeshjet janë të vështira, por duhet t’i marrim ato një nga një, pasi tri pikët janë njësoj me të gjithë ekipet.
Duhet të japim maksimumin deri në fund të arrijmë këtë objektiv, sepse kjo në një farë mënyre shpëton sezonin tonë.
Gjatë kohës që kemi punuar së bashku me Starovën kemi pasur mendime të njëjta. Sigurisht, kam mendimet e mia, por diçka e tillë nuk mund të realizohet sot për nesër, sigurisht duhet pak kohë.
Në javët në vazhdim do të shikoni një skuadër që do të reagoj ndryshe do të jetë më shumë sulmuese. Për trajnerin Starova do të pohoja se është kënaqësi për të që në krye të skuadrës ka lënë një person, me të cilin ka punuar për disa vite dhe ndryshimi është bërë brenda familjes.
Sigurisht, edhe idetë e Starovës që kam marrë, do t’i vë në praktikë, sepse suksesi nëse është i imi, patjetër do të jetë edhe i Starovës. Kemi punuar për shumë vite bashkë.
Sukajn dhe Malota? Ata e kanë përforcuar Vllazninë në repartet ku luajnë, por kemi besim dhe do të shkojmë në Shkodër për të fituar”. /Vipsport/
