Logjika e drejtuesve të klubit Vllaznia për të mos i kushtuar shumë rëndësi këtij fakti vazhdon. Ndonëse sot, interneti është mënyra më e mirë e komunikimit me mediat dhe tifozët e zjarrtë anë e mbanë botës, në klubin shkodran nuk duan t’ia dinë për këtë gjë. Pasnesër, më 18 shkurt mbushen plot 6 muaj që Bashkia Shkodër është pronarja legjitime me të drejta të plota e klubit të futbollit Vllaznia. Që atëherë, ka patur ndonjë tentativë për ta rindërtuar faqen e internetit ngaqë nuk u gjend gjuha e përbashkët me presidentin e mëparshëm për t’ua lënë në dispozicion sërish faqen ekzistuese (vllaznia.eu). Por këto tentativa kanë mbetur në mes. Ajo çfarë duhet për ta ndërtuar këtë faqe, nuk është ndonjë shumë e madhe. Problemi është vetëm ndërtimi pasi për azhornimin e përditshëm, në klubin Vllaznia ka njerëz që dinë ta bëjnë këtë gjë. Por sërish drejtuesit heshtin sa i takon problemit të faqes së internetit.
Mjafton të klikosh në WIKIPEDIA me emërtimin KF Vllaznia dhe aty e sheh qartë se faqja zyrtare e klubit nuk ekziston. Shkruhet vetëm vllaznia.al (?). Pikërisht ajo pikëpyetësja prapa tregon se kjo faqe me këtë emërtim nuk funksionon. Vllaznia në fakt i ka paratë për ta ndërtuar faqen e saj të internetit. Por ajo më shumë duket se është e interesuar për të harxhuar nga 5-6 mijë euro me lojtarë si Da Silva që sot nuk janë pjesë e saj, i intereson më shumë të provojë lloj e lloj futbollistësh dhe për të ndërtuar faqen e internetit ku mund të promovojë edhe rezultatet e saj, edhe lojtarët e talentuar të Akademisë etj, nuk i gjen mesa duket dot. Kuptohet janë shumë gjëra të tjera për të rregulluar më parë dhe ndoshta këtu kemi të drejtë. Sot, klubi Vllaznia ka patur festë. 93 vjetorin e krijimit të tij. Festë i thënshin në fakt sepse askush në klub nuk u kujtua për këtë gjë. Asnjë ceremoni, asnjë mesazh urimi për figurat që lartësuan emrin e kësaj skuadre në vite, asnjë dekorim apo diçka e tillë. Askush nuk është ndier për këtë çështje. Për më tepër që një urim nuk kushton asgjë. Ndërsa ne themi faqja e internetit që kushton ndoshta 1 milionë lekë të vjetra. Sa shumë që kërkojmë prej Vllaznisë edhe ne aman!
www.shkodrasport.com
