Në krahasim me një vit më parë, klubi shumësportësh Vllaznia ka vendosur t’i bëjë publicitetin e duhur ceremonisë së “10 sportistëve më të mirë të vitit”. Nëse një vit më parë, në adresë të sekretarit të këtij klubi Gëzim Mema pati jo pak akuza për mënyrën e përzgjedhjes së sportistëve më të mirë, por më së shumti për ceremoninë shumë të dobët që organizoi për nderimin e më të mirëve, sivjet duket se ai e ka kuptuar këtë gjë dhe ka vendosur ta bëjë në mënyrën e duhur.
Ka biseduar me drejtuesit e televizionit TV1 Channel dhe po ashtu edhe me Grand Hotel Europa dhe ceremonia do të zhvillohet me një jehonë jo të vogël në ambjentet e këtij hoteli luksoz ku do ketë shumë të ftuar, personalitete të sportit dhe drejtues të pushtetit lokal. Edhe anketimi është bërë më serioz këtë herë teksa janë shpërndarë shumë fletë-anketa për tranerë, specialistë e gazetarë sportiv dhe në bazë të këtyre votimeve do përzgjidhen 10 më të mirët. Shpresojmë që të ndodhë kështu sepse për disa vite me rradhë, numri është transformuar dhe ka shkuar deri në 15 duke e humbur seriozitetin e duhur të një ceremonie ku vlerësohen vërtetë më të mirët.
shkodrasport.com
