Xhovani Kolela bëhet gati për debutimin në Kategorinë Superiore, ku ka marrë drejtimin e Apolonisë. Për italianin, nuk do të jetë një debutim i lehtë, duke llogaritur se vihet përballë Vllaznisë në javën e parë.
Por në fjalët e tij për RTSH, Kolela shpreh besimin që ka te ekipi dhe siguron se ekipi do të luajë për maksimumin në çdo ndeshje.
“Ne përgatitemi për të fituar çdo ndeshje dhe qëllimi është të marrim maksimumin në çdo ndeshje. Nuk ka rëndësi emri i kundërshtarit, nëse është Turbina apo Vllaznia.
Nëse do të jetë më i fortë, do të jetë një mundësi për të punuar e rregulluar defektet. Do të stërvitemi me përkushtim e më pas të shohim se ku do të arrijmë.
Fitorja në Kupë? Mua më pëlqeu në tërësi ekipi, kishte sjellje të mirë në fushë, ishte agresiv. Ishte hapi i parë, të gjithë i kryen me përpikmëri detyrat ashtu siç i kishim punuar në stërvitje. Kjo ishte e rëndësishmja.
Sipas meje jemi në rrugën e duhur, por duhet pak kohë për të thënë nëse ekipi po ecën sipas filozofisë time”, tha Kolela. /vipsport/
