Që prej ditës së hënë në Shkodër ka nisur grumbullimi i kombëtares shqiptare të boksit e cila po i jep dorën e fundit përgatitjeve për Lojërat Mesdhetare që do të zhvillohen muajin e ardhshëm.
Për momentin janë tre boksierë të grumbulluar, Krenar Zeneli, Arjon Kajoshi dhe Bekim Vjerdha ndërkohë që pritet edhe një i katërt, Ardit Murja.
Interesant është fakti se bashkë me boksierët tanë po stërviten në palestrën e klubit Vllaznia edhe boksierët e kombëtares së Kosovës.
Trajneri i kombëtares shqiptare Zef Gjoni e vlerëson si diçka shumë pozitive këtë stërvitje të përbashkët ndërkohë që ka deklaruar se objektivi i boksierëve tanë është marrja e medaljeve në Lojërat Mesdhetare.
Ndërkohë, edhe kombëtarja e Kosovës me 4 sportistë është duke u stërvitur në Shkodër dhe trajneri i saj Shefki Bogujevci gjen rastin të falenderoj shkodranët për mikëpritjen.
Në këtë mënyrë, 8 boksierët shqiptarë dhe kosovarë që do të marrin pjesë nëLojërat Mesdhetare të Tarragonas që zhvillohen nga data 22 qershor deri më 1 korrik, pretendojnë t’i japin këtyre dy vendeve medalje dhe për këtë arsye, po stërviten fort.
© shkodrasport.com
