Përgatitjet e kombëtares shqiptare të boksit tashmë kanë marrë fund dhe mëngjesin e sotëm ajo do të niset drejt Spanjës për të marrë pjesë në Lojërat Mesdhetare të Tarragonës.
Pjesë e kësaj kombëtareje siç dihet janë boksierët shkodranë Arjon Kajoshi dhe Bekim Vjerdha si dhe Krenar Zeneli dhe Ardit Murja ndërkohë që bashkë me ta janë edhe trajnerët Zef Gjoni dhe Jozef Sermi.
Dy sportistët pas seancës së fundit të zhvilluar në Shkodër, për mediat janë shprehur entuziast për një paraqitje të mirë edhe në këto Lojëra ku do të synojnë marrjen e medaljeve.
“Objektivi im padyshim që është të futem në zonën e medaljeve.
Natyrisht, do tentoj të përsëris paraqitjen e mirë që bëra në Europian muajin e kaluar sepse me 2 ndeshje të fituara në Lojërat Mesdhetare, besoj se futem në zonën e medaljeve.
Megjithatë të presim. Ne jemi përgatitur siç duhet për këtë aktivitet dhe duhet ta konkretizojmë me sukses”- thotë Arjon Kajoshi.
Ndërkohë Bekim Vjerdha shton: “Prej 2 muajsh jemi të grumbulluar dhe gëzojmë një formë shumë të mieë sportive.
Objektivi është marrja e medaljes në këto Lojëra, çka do të ishte qershia mbi tortë për çdo sportist”.
Përveç tyre edhe trajneri Gjoni ka shumë besim se Shqipëria nuk do të dalë pa medalje nga këto Lojëra Mesdhetare dhe padyshim që ky do të ishte një sukses për sportin e boksit në vendin tonë.
© shkodrasport.com
