Kombëtarja Shqiptare e femrave ka mbyllur edicionin eliminator të Euro 2021 me një humbje minimale 1-0 në transfertë ndaj Portugalisë, duke mbetur përfundimisht në vendin e parafundit të grupit me vetëm 6 pikë të grumbulluara.
Luzitanet janë në vendin e parë dhe pretendentet kryesore për të siguruar kualifikimin direkt, ndaj transferta e sotme ishte parashikuar e vështirë për vajzat kuqezi, që gjithsesi ia dolën të luftojnë mirë dhe me pak fat mund të kishin shmangur humbjen.
Golin e vetëm për Portugalinë e shënoi sulmuesja 22-vjeçare e Sportingut të Lisbonës, e cila kërceu mirë gjatë një krosimi në zonë dhe arriti të dërgojë topin në rrjetën e portës së Shqipërisë.
Nga ana tjetër vajzat e drejtuara nga trajneri shkodran Armir Grima, luftuan deri në fund për të shmangur humbjen dhe iu afruan disa herë rrezikshëm zonës portugeze, por pa arritur të finalizojnë si duhet.
Mbyllet kështu edhe ky edicion eliminator, ku Shqipëria regjistroi 6 humbje dhe dy fitore, të dyja ndaj Qipros, skuadër të cilën ia doli ta lërë poshtë vetes në renditje.
