Ekipi Kombëtar i Shqipërisë do të luajë dy ndeshjet e fundit kualifikuese për Euro 2020. Takimet janë programuar në 14 dhe 17 nëntor dhe ekipi ynë do të presë Andorrën dhe kampionët e Francës.
Trajneri Edouardo Reja i ka ndryshuar fytyrën ekipit kuqezi, teksa në dy ndeshjet e fundit është vënë re puna e tij e mirë. Dallimi është i dukshëm, krahasuar me ish trajnerin Panuçi që nuk mundi të ndërtojë një ekip.
Skuadra kuqezi ndodhet momentalisht në kuotën e 12 pikëve, pas tetë ndeshjeve të luajtura. 76 vjeçari e mori “timonin” e stolit kur ekipi grumbullonte tri pikë dhe e vetmja sfidë negative ishte ajo e Francës (4-1), ndeshje që edhe falet duke parë kundërshtarin.
Në gjashtë ndeshjet e luajtura me të në stol, kemi fituar tre dhe humbur po kaq, por me Islandën dhe Turqinë mund të kishte ndodhur ndryshe, nisur nga loja e ekipit.
Ndeshjet e radhës me Andorrën dhe Francën luhen në shtëpi dhe në rast se ekipi siguron tri pikë, atëherë Reja do të hynte në historinë e Shqipërisë, pasi në asnjë fazë kualifikuese nuk kemi mundur të sigurojmë 15 pikë. Rekordi është ai i kualifikueseve Euro 2016, ku siguruam 14 pikë dhe pjesëmarrjen në Europianin e Francës.
Në dy rastë kemi kapur kuotën e 13 pikëve, Për Euro 2006 dhe Euro 2004 kur në stol ishte Peter Brigel. Edhe në kualifikueset e Botërorit Rusi 2018 e mbyllëm të tretët me 13 pikë. Reja dhe ekipi e kanë vetë fatin në dorë, nëse do të hyjnë në historinë e futbollit shqiptar ose jo./newsport/
