Shqipëri – Kazakistan pritet të marë vëmendjen e publikut të dielën pasdite. Kombëtarja shqiptare pret kazakët në një moment që i duhet vetëm fitorja dhe i ka të gjitha mundësitë, duke qënë se kundërshtari është nga më modestët e grupit.
Duke qënë se kjo është një periudhë që tifozët mungojnë në stadium për shkak të pandemisë Covid 19, të gjithë kanë mundësinë përpara ekranit të përcjellin jo vetëm ndeshjen që nis në orën 18.00, por edhe emisionin “Endërr kuq e Zi”, me analizën, kronikat intervistat dhe lidhjet direkte si përpara ashtu edhe prapa ndeshjes.
Gjithçka nis në orën 17.10 në një studio përgatitur në ambjentet e “Arenës Kombëtare”. Në drejtimin e Hygerta Sakos dhe me prezencën e specialistëve Shkëlqim Muça e Gerd Haxhiu, si dhe me gazetarët Pano Xhixho, Alban Hasani dhe Kristo Thoma, emisioni “Ëndërr Kuq e Zi” do të trajtojë gjithë ecurinë e ekipit tonë kombëtar në “Uefa Nations League”.
Lajmet më të fundit nga formacionet, intervista me protagonistë, do të plotësojnë prag-ndeshjen kundër Kazakistanit. Ndeshja nis transmetimin në orën 18.00 dhe vjen në RTSH me cilësinë më të lartë të figurës dhe zërit, për t’i afruar publikut stadiumin në shtëpinë e tyre, pa asnjë abonim apo kosto shtesë.
Ndeshja mund të ndiqet LIVE në RTSH 1 HD, RTSH Sport, në “webin” më të ri, www.rtsh.al, por edhe në Radio Tirana, apo aplikacionin RTSH Tani. Menjëherë pas ndeshjes, atmosfera do mbetet e njëjtë me post-ndeshjen dhe intervistat e protagonistëve.
Trajneri Reja dhe futbollistët më të spikatur, nuk do të mungojnë në lidhje direkte në transmetuesin publik. Shqipëria ka nevojë për tifozët e saj dhe nëse pandemia i ndalon të jenë në stadium, askush nuk i mohon dot shqiptarëve mbështetjen nga ekrani…
